Ek en Annelie ALWEER in die Kaap...

So gebeur dit toe mos dat die vriendelike gemeente in die Kaap vir my nooi om vanoggend by hulle te kom preek. Hulle sê Annelie moet saamkom. Hulle koop selfs vir ons vliegkaartjies... Hoe kan 'n mens dan nee sê vir sulke wonderlike geleenthede in die lewe. So ek en Annelie is in die Kaap op die oomblik. 

Ek het vanoggend my heel beste probeer met die preek. So ligte ou glipsie of twee gehad langs die pad, daar was so effense misverstandjie oor op wie die liedere op Powerpoint moes hê... maar niks ernstig nie. In die Kaapse stormweer was daar nou nie so baie mense in die kerk nie.  Maar ek het dit geniet om in die historiese ou geboutjie te mag preek... 

Onse kinders is veilig by ons huis, en ek en Annelie geniet 'n paar dae saam, soms met goeie vriende, soms lekker alleen. Ons het bv gisteroggend baie lekker ontbyt saam geëet by die ou Farmstall by die Total garage net buite Melkbosstrand, so skuins agter Atlantic Beach se Golflandgoed.  Dis koud en nat in die Kaap. Maar dit maak dit so lekker voor die kaggelvure... 

Hierdie reis doen ons sommer baie goed!  Ons eet baie interessante disse op baie interessante plekke, niks Wimpy of Spur nie, net lekker onafhanlike plekke wat hulle bes doen om goeie kwaliteit voor te berei.

Maar more is die pret alweer verby, dan moet ons alweer op die vliegtuig spring, en 'n verskil gaan maak waar ons geroep is om te wees...  Ek geniet net hierdie wegbreekkansie saam met my vrou geweldig baie!

Bernard 17 vandag!

Liewe Bernard,

Voor jou geboorte was ek bang om die pa van 'n seun te wees.  Ek het nie broers gehad nie. Ek het op skool nogal gesukkel met vriendskap.  Ek was nie baie goed in rugby nie, alhoewel ek my bes gegee het vir Newcastle Hoërskool se 3e span.   Ek was bang dat ek nie vir jou 'n goeie voorbeeld sou kon stel in die lewe nie.

Maar met jou vriendelike geaardheid het jy van die begin af diep in my hart gekruip. Ek het 'n belangrike ding van vaderskap geleer- dit gaan nie oor die abstrakte idee om 'n pa te wees nie, maar die verhouding met 'n spesifieke seun, wat die verskil maak.

Ek is baie trots op jou.  Ek bewonder die man wat jy besig is om te word. EK bewonder jou sagte hart, en die mooi manier waarop jy met mense werk. Ek bewonder jou talent op 'n rugbyveld, en waar jy hard maar eerlik speel, jou beste gee sonder om ander doelbewus te beseer.

Ja, nou kan jy 'n leerlinglisensie vir 'n kar kry. En ek hoop en bid dat jy in hierdie opsig ook meer verantwoordelik as ek gaan wees.  Ek dink jy gaan...

Mag jy ook eendag die regte meisie ontmoet, wat die mooi in jou gaan raaksien, en mag jy haar soos 'n prinses behandel, maar dis hoe ek jou ken- jy sal...

Geniet jou verjaardag. Dis baie lekker om jou pa te wees, ek is baie trots op jou!

Jou Pa...

Eerste Twitterdiens oor Kolossense 1- Wie is Jesus?

Hierdie is 'n preek vir NG Gemeente Nylstroom-Oos op 5 Mei 2013. 

Inleiding

In die ou dae het 'n plattelandse dominee eendag rondgestap, en toe op 'n baie vreemde toneel afgekom. Daar was 'n jong seun, wat by 'n wa gestaan het. Die wa se vrag hooibale het afgeval en op 'n hoop gelê.  Dit was baie warm, maar die jong man het verwoed geprobeer om die hooibale weer terug op die wa te kry. Hy was papnat gesweet, en het na sy asem gehyg.

Die dominee het hom gestop en gesê hy lyk darem baie warm, wil hy nie net 'n oomblik stop en water drink dat hy kan beter voel nie? "Nee dankie", sê die jong man- "my pa gaan nie daarvan hou nie!"  Die dominee sê vir hom:  "Maar alle mense mag mos soms darem 'n breuk ook vat! Kom, rus so bietjie dat jy kan beter voel!"

" Nee", sê die jongman, "my pa gaan nie daarvan hou nie. "

Die dominee het sommer omgekrap geraak. Hy sê toe: "Klink my jou pa is 'n regte slawedrywer! Waar kan ek hom in die hande kry, ek gaan verseker vir hom iets te sê hê oor hoe hy jou behandel! " "Wel", sê die jongman- "hy lê daar onder die hooibale... "

Wat op aarde leer ons uit hierdie verhaal? Die jong man het geweet wat hy moes doen. Daar was 'n sin vir dringendheid by hom,  hy was doelgerig en niemand, nie eers die dominee, kon hom van sy koers afhaal nie.  Maar dit het nie gekeer dat iemand hom probeer stop het nie!

Die dominee het die situasie heeltemal verkeerd verstaan. Hy was oortuig dat hy reg was, en hy het alles in sy vermoë probeer om die jong man te laat ophou met wat hy besig is. Wat het dit met vanoggend se teks te doen? 

Die kerk in Kolosse het ook so 'n probleem gehad. Hulle was 'n doelgerigte kerk gewees. Hulle het baie hard probeer om hulle Hemelse Vader te verheerlik.  Paulus het selfs vir hulle 'n brief geskryf waarin hy hulle aanprys vir hulle geloof, en hulle liefde.

Maar daar was iemand wat hulle probeer stop het met wat hulle besig was.  Paulus het in Kol 2:8 vir hulle gewaarsku: 

Daar was godsdienstige mense in Kolosse wat die kerk probeer stop het in waarmee hulle besig was.  Hierdie mense het allerhande vroom praatjies gehad, maar die mense weggelei van die basis van hulle geloof af. Ander dinge as Jesus het skielik belangrik geword. 

Dit is vandag tyd om weer oor hierdie dinge te praat. Want daar is vandag weer sulke stemme soos destyds in Kolosse. Daar is mense wat allerhande interessante teorië oor die geestelike lewe het. Party wil weer heeltemal die Joodse name vir God as die enigste Name gebruik. Party wil weer die Sabbatdag soos in die Ou Testament hou. Party wil hê jy moet in tale kan praat om gelowig te wees.  Jy moet kan profeteer.  Ek is verbaas dat iemand nog nie weer die besnydenis ook wil hê nie!  Baie teorieë word voorgehou as Die Waarheid- en word gesê die Kerk  mislei jou.  So word die kerk al meer opgebreek deur 'n klomp teorieë wat as Die Waarheid verkondig word.

Dis waarteen Paulus dit in Kolosse gehad het. Dis waaroor ek so lekker omgekrap raak deesdae.

Daar is net een Waarheid in die kerk- en dit is die Persoon van Jesus Christus. Jesus het gesê: Ek is die Weg, en die Waarheid, en die Lewe...

Alles anders is bysake!  Die Waarheid is Jesus!

As jy vergeet wie Jesus is, en as jy vergeet wat Hy vir jou gedoen het,  dan sal jy altyd 'n teiken vir dwaalleer wees.  As jy nie op die fondament van Jesus jou geloof bou nie, gaan jou geloofshuisie êrens inmekaar tuimel.

Daarom begin Paulus sy brief aan die Kolossense om weer te herinner wie Jesus is, en wat Hy alles vir ons gedoen het.

1.    A. Jesus is ‘n ewigheid al ons Middelaar.

Wanneer ‘n mens Kol 1:15-20 in Grieks lees, is dit pragtige poësie, met ‘n baie duidelike ritme. Dit word algemeen aanvaar dat dit ‘n gesang uit die Vroë Kerk was, wat Paulus hier aanhaal. Dit is ‘n gesang wat die eerste Christene herinner het wie Jesus is. 

1. Jesus is die Seun van God.

Jesus was nie maar net nog ‘n goeie mens êrens in die antieke geskiedenis nie. Hy is nie net ‘n profeet soos ‘n Elia of ‘n Jesaja van ouds nie. Hy was nie ‘n aardse Koning met baie mag, soos Dawid nie. Jesus staan in ‘n heel unieke verhouding met God. Hy is self ook ewige God, deel van die Drie-Eenheid wat aan ons geopenbaar word in die Bybel.  Daarom is sy lewe op aarde ook die grootste gebeurtenis ooit in die geskiedenis, toe God self in die volheid van die tyd sy Seun gestuur het om sy liefde aan die wêreld bekend te maak. 

2. Jesus is die Beeld van God.  

Van die mense in Kolosse het geglo dat God nie die aarde geskep het nie, aangesien Hy niks sou maak wat boos en sleg is nie. Alle stoflike dinge, insluitend ons menslike liggaam, was volgens hierdie tipies Griekse denkwyse sleg, en kon daarom nie van God af kom nie.

Maar Paulus stel Jesus weer aan hulle voor. Deur sy wese, ook sy Liggaam, vertoon Hy die beeld van God. God het die mens, vir Adam en Eva, geskape as sy beeld. Maar met die sondeval het die beeld van God in die mens gebreek. Vir baie jare het hierdie wêreld nie meer die beeld van God gesien nie. Totdat Jesus as mens gebore is. En Jesus was ook mens, waarlik mens, maar sonder sonde. En daarom kon Hy weer die beeld van God vertoon. Die apostel Johannes het gevra- wil jy sien hoe lyk die Vader? Kyk dan na die Seun. (Joh 14:9).

‘n Volgende dwaalleer in Kolosse was dat Jesus nie die Seun van God was nie, maar net nog een van die talle tussengangers tussen God en mens. Dit is ‘n dwaalleer wat vandag nog steeds voorkom in die wêreld. Baie mense glo vandag dat Jesus net nog ‘n goeie mens was, soos ‘n Mandela, of ‘n Gandhi. Selfs Mohammed, die vader van Islam, het in die Koran Jesus ingeskryf as net nog ‘n profeet.  Was Jesus net ‘n goeie mens? 

3. Jesus is die Eersgeborene (Eerste) van die Skepping.

Paulus doen groot moeite om Jesus aan ons voor te stel as Ewige God, van die begin af saam met die Vader. Hy was daar voor die Skepping. Dit is mos wat Johannes ook vir ons in hoofstuk 1 van sy evangelie sê: In die begin was die Woord daar... en die Woord was by God, en die Woord was self God. Hierdie Woord is Jesus.

 4. Jesus is Skeppingsmiddelaar.

Middelaar- dit is ‘n tussenganger, iemand wat dinge laat gebeur.

Paulus sê as ons die Skepping wil verstaan, kan ons nie dit indink sonder die Seun van God nie.  Vers 16- “God het deur Hom alles geskep wat in die hemel en op die aarde is, alles wat gesien kan word, en alles wat nie gesien kan word nie.”

Die skepping staan nie los van Jesus nie. Johannes 13 stem saam en sê ook dat alle dinge deur Hom tot stand gekom het. Paulus sê Hy is aangestel bo alle konings, heersers, maghebbers, gesagvoerders. Paulus wil Jesus voorstel as die Verlosser wat van die begin af in ons wêreld betrokke is. Hierdie is sy wêreld, want alles is vir Hom geskep. En omdat hierdie sy wêreld is, kan ‘n mens net waarlik gelukkig wees as jy in ‘n verhouding met die Koning van die wêreld lewe. Dit is hoekom hierdie wêreld so deurmekaar is- die Koning word nie erken en geëer nie.

5. Jesus hou alles in stand. 

Vers 17 sê: “Voor alles was Hy al daar, en deur Hom bly alles in stand.”

Een van die vroegste dwaalleer was dié van Arius. Hy het gesê dat daar ‘n tyd was wat Jesus nie was nie. Of anders gestel, daar was ‘n tyd wat Jesus nie bestaan het nie. En baie mense vandag dink ook so. Hulle dink dat Jesus eers met sy geboorte op daardie eerste Kersdag op die wêreld se verhoog verskyn het.  En tog leer ken ons Hom in die Woord as Ewige Here, wat alles onderhou. Wat beteken dit vir ons vandag? Jesus is my Ewige Here, wat altyd vir my sorg. 

6. Jesus is die Hoof van die kerk.

In Romeine 12, en 1 Kor 12, gebruik Paulus die beeld dat die Kerk die liggaam van Christus is. Elke gelowige is deel van hierdie liggaam, en het sy eie unieke funksie binne die kerk. Maar wie is die Hoof van die kerk. Gelukkig nie die dominee of die kerkraad nie! Vers 18 gee die antwoord.

“Hy is die Hoof van die liggaam, van die kerk. Hy is die oorsprong daarvan. Hy is die Eerste, die Een wat uit die dood opgestaan het, sodat Hy die eerste plek in die heelal inneem.”

Die Opgestane Here, die Lewende Here, is die Hoof van die kerk. Deur Jesus se opstanding uit die dood het Hy die nuwe lewe vir gelowiges gewaarborg. Die opstanding van die Here Jesus uit die dood was die oorwinning oor alle magte wat die mensdom gevange gehou het. Met daardie eerste Paassondag het Jesus nuwe hoop en nuwe lewe vir die mensdom gebring.  En dit is dan ook hoekom die kerk bestaan- ons moet die boodskap van hoop en nuwe lewe aan alle mense verkondig, en dit met ons lewens vir hulle wys. Kan die wêreld regtig in ons lewens sien dat ons anders is, dat daar ‘n nuwe lewe in ons te sien is? Ons moet elkeen bekend wees as mense wat hoop bring. Kry ons dit reg? Of kla ons ook maar net soveel soos die mense sonder enige hoop?

7. Jesus is waarlik God en Verlosser.

Vers 19 sê dat God met sy volle wese in Jesus woon. Alle mag wat God as Skepper en Onderhouer van die heelal het, het Hy ook aan Jesus gegee. God het Homself ten volle aan die wêreld in Jesus geopenbaar. Daar is geen ander tussenganger of middelaar tussen God en mens as Jesus nie. Deur Jesus is daar nou vrede met God. v 20 “ God het deur Hom alles met Homself versoen. Deur die Bloed van sy Seun aan die kruis het Hy die vrede herstel, deur Hom het Hy alles op die aarde en in die hemel met Homself versoen.”

Wie het Jesus se versoening nodig?

2. Elke mens het Jesus as Verlosser nodig.

Die Bybel sê dat elke mens gebore word as vyand van God. vers 21- “Ook julle was voorheen ver van God af en vyandig gesind teenoor Hom, soos blyk uit julle sondige lewenswyse.”

Van nature is ons in opstand teenoor God. Ons leef nie in ‘n verhouding met Jesus as Koning van die wêreld nie. Mense steur hulle nie meer aan God nie. Die wêreld se mense word al hoe meer ateïsties.

Maar op ‘n dag begin die Heilige Gees ‘n mens oortuig dat daar ‘n God is, en dat jy nie meer langer sonder God kan bestaan nie. ‘n Oorweldigende sondebewustheid pak ‘n mens beet. Jy kom skielik agter hoe die sonde ‘n skeidsmuur tussen jou en God geword het, wat jy nie self kan wegneem nie.

Ons kom agter dat die sonde ‘n geweldige kloof tussen ons en God veroorsaak het. Kan ons self oor hierdie kloof van sonde spring?  Ons kan dan nie eens oor die Grand Canyon spring met ons eie krag nie. Nie eers die Olimpiese gouemedaljewenner in verspring kan dit begin oorweeg nie. Hoeveel groter is die kloof tussen God en mens nie as die Grand Canyon nie!  En geen mens kan eers begin dink dat hy self dié kloof kan oorsteek en vrede met God verdien nie. Die kloof tussen God en mens, wat sonde veroorsaak het, is daarvoor veels te wyd.

Hoe kan ons dan weer met God versoen word? Hoe kom ons in die regte verhouding met God? Daarvoor kan net God sorg. “Maar nou het Hy ook julle met Homself versoen deurdat sy Seun as mens gesterf het om julle te heilig, sonder smet en onberispelik voor hom te stel.” 

God het Jesus laat gebore word aan ons kant van die kloof. En omdat Jesus sonder sonde is, kon Hy die brug word wat die kloof na God oorbrug. Ons kan nie met sonde voor God verskyn nie. Maar Jesus het al ons sonde op Hom geneem en daarvoor betaal. Ons sonde het geen skuld meer nie, en ons is welkom by God.  Dit is net moontlik deur Jesus wat ons sonde wegneem.

Wat is ons verantwoordelikheid in ons verlossing? Ons moet in geloof aan Jesus vashou.

Vers 23- “Maar dan moet julle vas en sterk bly staan in die geloof en julle nie laat losruk van die hoop wat in julle gewek is deur die evangelie wat julle gehoor het nie.”

Jesus het vir ons alles gedoen wat nodig is om met God versoen te word. Hy het saam met die Vader gewerk om vir ons ‘n leefwêreld te skape. Hy werk saam met die Vader om elke dag vir ons te sorg. Hy het mens geword, en al ons sonde op Hom geneem. Hy het onskuldig aan die kruis gesterf sodat ons sonde vergewe kan word. Hy het uit die dood opgestaan, om die ewige lewe vir ons te waarborg. Hy is die Hoof van die kerk, dié kerk wat die evangelie aan die wêreld verkondig, wat hoop aan die wêreld bring.

Om waarlik te lewe, moet ons die Koning van die wêreld ken. Om waarlik gelukkig te wees, moet ons waarlik vir Hom lewe. Ons het Hom nodig..

Mag ons elkeen daarom aan Hom alleen bly vashou, en ons nooit laat losruk van die lewende hoop wat Hy vir ons is nie. Mag ons lewenswa nie omval met allerhande onnodige bakleiery oor klein dogmatiese verskilletjies nie. Kom ons fokus daarop om Jesus lief te hê as ons Redder en ons Hoof. En omdat dit Sy opdrag is- kom ons hê mekaar lief! 

Amen.

Gee 'n vrou 'n Pinkie...

Gisteraand moes Annelie die ATKV Redenaarskompetisie in Pieterskwane gaan help beoordeel.  Sy sou eers na 9 tuiskom, en die drie monstertjies in die huis moet mos eet.
So is dit toe maar die pa van die huis se verantwoordelikheid om te sorg vir kos voor ek ook uit is op besoeke vir die aand.

EK kom net agter- al my kos lyk dieselfde! Ek het dringend nodig om ander goeters te leer maak. MAAR: die goed wat dieselfde lyk, proe darem altyd lekker vir my. Jammer vir al my vriende wat dalk al jare dit vrees dat ek vir hulle gaan nooi vir ete...

Gisteraand was dit: Beef Wellington! Ja, my Hollandse vriendin het my mooi saggies daarop gewys dat die regte Beef Wellington in 'n korsdeeg is, en myne is duidelik meer van die Potjiekos genre...

Maar dit is wat beskikbaar was in die huis gister, of goedkoop was by Pick 'n Pay.

Eers het ek die vleis in die beskikbare druiwesap van Wellington geweek.  Ek en my goeie vriend van Ellisras het toe nie die Hugenote Kollege verslag klaar bestudeer laas keer nie (interne ou grappie...)

Ek het die vleis mooi verbruin in die gietysterpot, en toe MIldelike Kerrie daarby gegooi. (Ek hoor Masterchef praat van "Caramelize"). Nog so bietjie Old Brown Sherry daarby. Dit is 'n hele ruk op die stoof gelos, om mooi sag te kook. Ek het aartappels in skywe gesny, nog met die skilletjie aan, en bygevoeg. Ook so 500 gram van Pick 'n Pay se naamlose groente.

OP die ander stoofplaatjie het ek Pick 'n Pay se Wilderys met songedroogde tamatie gereed gemaak.

Dit is aan die kinders bedien: Beef Wellington op 'n bed van Wilderys.

Ek dink ek sou punte verloor op Masterchef vir aanbieding- daar kort so bietjie kleur. Maar die smaak- dit was vir my baie lekker. Annelie het dit ook baie geniet om 'n bord warm kos te kry toe sy gisteraand moeg en honger by die huis instap.

Maar wat is die gevolg van sulke goeie dade? Dit word mos nie ongestraf gelaat nie...
Kyk die boodskappie wat vir my gelos word...

Nou vra ek met trane in my navy blou ogies... hoe gaan 'n man ooit wen?

Word Riders 2013 dag 1 Ek en Anja

 Op dag 1 van Word Riders 2013, op Saterdag 13 April, het Anja saam met my gery om die groep ryers by Warmbad te gaan ontmoet en te begelei na Weesgerus toe.
Ons het saam op ou Huisbesoek gery.

Soos 5 jaar gelede ook al...

Vrydagaand bly koning in die Pastorie!

More begin die Word Rider 2013, en ek is besig om in te pak daarvoor.

Maar op 'n Vrydagaand, as al my kinders tuis is, is dit vir my baie, baie belangrik om vir hulle lekker kos te maak. Met so bietjie hulp natuurlik! 

Gisteraand se episode van Australian Masterchef was so bietjie van 'n ramp, toe die finale 12 van die 2011 seisoen op 'n skaapplaas losgelaat is. Hulle moes op Matt Moran se pa se plaas 'n ete op die vuur voorberei. Hulle het die heerlikste vars lam tot hulle beskikking gehad, en baie netjiese giettyster potjies. En tog het die meeste van hulle maar goed drooggemaak, met 4 1/2 ure tot hulle beskikking... 

Ek hou van kos op die vuur maak.  Vanaand was daar hoenderdye beskikbaar. DIe hoenderdye se velle is afgehaal (net bloot omdat cholestrol glo nie goed vir 'n mens is nie, geen ander rede wat ek aan kan dink nie!) Dit is met so bietjie olyfolie gesmeer, en daar is growwe sout en speserye ingemasseer. 

Daarna is die hoendertjie in die Weber gebraai, met so bietjie eikehout wynvaatjie skaafsels om dit lekker te rook daarmee saam.  Baie keer vra my gaste my hoe ek weet wanneer dit gaar is. Ek weet nie wat om te antwoord nie. Ek het net die gevoel... As ek nie vir daardie gevoel luister nie, braai ek dit droog...  Die hoenderdye is die hele tyd ook bedrup met suurlemoensap. 

Vanaand was daar maar net Namibiese hardehout charcoal beskikbaar om dit op te braai, gewoonlik verkies ek 'n mengsel van sekelbos, en wettig geoesde hardekoolhout. 

So met die braaiery is 'n verdwaalde bottel Villiera Sauvignon Blanc opgespoor wat my vriend Bernard nog verlede jaar vir my gegee het. Daardie wyntjie het mooi geloop vanaand, Bernard! 

Die dames in die huis het aartappels gekook, met 'n suurroom op. Daar was gemengde groente in 'n romerige sous, en beetslaai uit die bottel. 

Die ete self het baie lekker afgeloop, met goeie geselskap, ons het maar die seuns se rapporte probeer vermy... 

Dit bly vir my so lekker, die kere wat ons as gesin saam kan wees en om 'n tafel kan aansit. Sonder enige selfone aan tafel.. Met al die kinders hier. Ons was vir soveel jare so gewoond daaraan, en skielik is selfs dit nie meer vanselfsprekend dat almal teenwoordig is nie. 

Ons het lekker gesels oor more se Super 16 finaal van ons Hoërskool teen Louis Trichardt, en Bernard wat vir die eerste keer in die begin uitdraf in die 1e Span, 'n baie groot geleentheid in ons gesin... 

My pa het glo 1e spanne gehaal, die talent vir rugby was helaas heeltemal afwesig by my gewees, ek was maar 'n benchwarmer vir die 3e span, en daarom ook nie te hoog gereken as positiewe bydrae tot die Hoërskool Newcastle se sportman van die jaar nie... 

Ek is net baie bly Bernard hoef my nooit te tackle nie, ek vermoed dit kan baie seer wees. Ons het ook gesels oor die Word Riders waarby ek more aansluit, vir die reis om Bybels te gaan plaas, en die Bybelgenootskap so bietjie beter bekend te stel. 

Maar die hoogtepunt van die aand, selfs beter as my hoender, was die nagereg! Anja was lus vir 'n Roly Poly, en het dit die eerste keer in haar lewe gebak.  Sy het dit meesterlik gedoen! 

Met so 'n poeding kan die aand mos net lekker wees!  Bedien met 'n heerlike warm vla. 

Na die tyd was daar filterkoffie, en toe 'n glasie van Calitzdorp kelders se Rooi Muskadel om die ete mee af te rond... 'n Heerlike aandjie in die Pastorie- ons eet byna nooit so luuks nie, maar ek is op pad van die huis af vir 'n week, en Anja Maandag terug universiteit toe. 

Daarom vier ons die lewe, familiewees, en soveel genade wat ons ontvang. 

En nou MOET ek regtig gaan pak vir die Word Riders...  Lekker aand by jou! 

DVDV...

Dank Vader dis Vrydag!!!

My afdag. My "private dag" volgens my Diensverhoudinge Bestuurder...

from: http://lifebeginsatretirement.blogspot.com/2011/01/tgif-in-65-hours-to-be-exact.html

Maar hierdie gaan 'n besige Vrydag wees!
More begin die Word Riders te ry! EK en kollega gaan saam op die 2000 km toer, van Kempton Park af deur ons dorp, na Louis Tricharddo, Tzaneen, Blyderivierspoort, Laeveld, Secunda... Ons sien baie uit.

• VAndag moet my BMW nog gewas word! 
• Vandag moet ek nog pak. 
• Vandag moet ek nog by twee bejaarde dames uitkom wat my graag wil sien voor ek ry. 
• Vandag moet ek nog die hout gaan haal vir die Word Riders se braai more by Weesgerus. 
• Vandag moet ek nog seker maak die koelkamer by die kerk is aan, en die bakke is gereed om Spif Hoenders se uitstekende donasie van 75 halwe hoenders in ontvangs te neem.
• Vandag moet ek nog saam met my dogter gaan brekfis....
• Vandag moet ek nog seker maak die broodjies vir more is bestel, en botter aankopp
•  Vandag moet ek nog seker maak ons orrelis het al die liedere vir Sondag se Word RIder erediens gekry. 
•  Vandag gaan seker nog 'n paar ander interessante draaie met my maak. 
• Vanaand wil ek graag braai saam met my gesin, beter as daardie Aussies op Masterchef gisteraand! 

Wat jy ook al doen vandag, maak die beste daarvan. Onthou, Vrydag kom net een keer per week! 

Wat 'n Kaapse Draai!

Hierdie week het in ons gesin gegaan oor drome waar maak. Dit het begin met ons Huweliksherdenking, wat ons so graag by die Blue Peter Hotel wou uitkom, waar ons destyds ons grootste gedeelte van ons wittebrood gevier het: 

Dit het gegaan oor familiebande sterker bou...

Dit het gegaan oor vriendskap...

 En nog meer vriendskap...

Daar was ook tyd vir verhoudingsbou... 

En drome het waar geword...

Ons het mooi plekke besoek...

En sommer baie pret gehad...

Dit was so lekker om my seuns op Route 62 te neem! 

In dit alles het ons ook die plek van Broederliefde besoek...  ons het daardie ene nie sien kom nie...

Ons het Baie pret gehad! Maar vir Anja en Bernard baie gemis in die reis...

Clifton se strand...

So is ons mos nou in die Kaap om my BMW te kom haal, wat Francois so mooi herstel het. Die vakansie is maar 'n vinnige enetjie

Maar 'n mens was nie in die Kaap as jy nog nie op Clifton se strand was nie. Ten spyte van die plek se wonderlike reputasie het AL die dames hulle buitengewoon goed gedra gister. Ek dink die seuns was so effens teleurgesteld. En ek? Nee, soos my niggie my op facebook herinner- ek het nog steeds die mooiste ene aan my sy...

Clifton bly vir my een van die mpoiste strande in die hele wye wêreld. Daardie poeierfyn spierwit sand, die pragtige blou van die see en die lug op 'n helder dag- dis mooi. Baie, baie mooi...

Voorbereiding vir Goeie Vrydag

In die kerklike wêreld dink ons nou saam aan die Lydingstyd van ons Here Jesus. Ek het die verantwoordelikheid om die Goeie Vrydag diens te lei. 

Vandag is die dag wat ek in my studeerkamer verdwyn. 

Op my rekenaar speel die CD- His Passion- a Worshipful journey to the Resurrection (net foto, moenie kliek nie!)

Die fondament vir die diens wat ek gaan lei, is die sewe Kruiswoorde van Jesus. 

Dit bly so aangrypend- ek lees op die oomblik op die internet oor wat die kerklike wêreld oor die algemeen daaroor te sê het. Uit die verskillende Christelike tradisies- Ortodoks, Katoliek, Gereformeerd, Charismaties, Pinkster, Kopties... vir almal bly die Goeie Vrydag boodskap belangrik. 

Ek het nie die behoefte om in die detail van hoe Jesus gekruisig is, in te gaan vanjaar nie.  Ek het daardie behoefte om te fokus op sy Middelaarsrol.  Hoe Hy die kloof tussen God en mens kom oorbrug het.  Hoe sy woorde aan die kruis gespreek het van sy mensheid- "Ek het dors". Oor vergifnis- "Vader, vergewe hulle want hulle weet nie wat hulle doen nie..." terwyl hulle besig was om Hom dood te maak. Oor die versorging van sy moeder "Daar is u seun- daar is jou moeder".  Oor sy intense ervaring van die afwesigheid van genade- die dieptepunt van lyding waar die verhouding met God afgebreek het "Eli Eli lema sebagtani"- "My God, my God, waarom het U my verlaat?". Sy boodskap van hoop vir 'n sterwende moordenaar langs Hom "Dit verseker Ek jou, vandag sal jy saam met My in die Paradys wees". En uiteindelik- die oorwinning oor die gebrokenheid- "Dit is Volbring!" En die finale oorgawe- "Vader in U hande gee Ek my gees oor..." 

Op die oomblik speel Kyrie- van die Integrity Worshipo Singers wat vra "Restore to me the joy of your salvation... Kyrie Eleison, Lord have Mercy..."

Dit is vir my aangrypend hoe diep die versoening is wat moontlik is in ons Here Jesus. 

Terselfdertyd wil ek soms huil oor hoe min die Here se kinders hiervan verstaan. Ons is so duur gekoop. Daar is so absoluut niks wat ons kon bydra vir genade nie. En tog kan die Here se kinders so geestelik hoogmoedig wees, en dink party is beter as ander. Party het so al die antwoorde en al die wysheid (dink hulle). Kerkmense byt en verskeur mekaar nog steeds. Die kerk is nog steeds nie die plek van liefde en aanvaarding vir almal nie. Dis nie altyd 'n veilige adres om na toe te gaan as jy stukkend is en hulp nodig het nie. Een van die dinge wat my die meeste vang, is hoe die Here se kindertjies van mekaar kan skinder, soms selfs in gebed!  Kyrie Eleison! 

Ons kan ons ook so met vroom dinge besig hou, en geen verskil in ons gemeenskap maak nie. Ons kan so lekker in ons omgeegroepe saam groei , dat niemand anders by ons welkom voel nie. Ons kan so ons eie opinies oor die reg en verkeerd in ons naaste se lewe hê- daardie ding van die splinter in ons naaste se oog, dat ons soms die hele balk in ons eie oog miskyk. "There is no Shadow in Your presense..." (The Offering- Paul Baloche) "I bring an offering of worship to my King..."  Hoe kan ons die Here worship as ons hande nie uitreik na ons naaste toe nie?  Hoe kan ons dink ons glo as ons nie mekaar liefhet, soos Jesus in Joh 15 beveel het nie- ons bly in sy liefde as ons sy opdragte uitvoer- dit is die opdrag- ons moet mekaar liefhê (Joh 15: 12)  Die Here het ons duur gekoop om mekaar lief te hê, as dit in ons lewe ontbreek, dan probeer ons verniet aanbid, dink ek. Kyrie Eleison... 

Die afgelope ruk is ek weer oorval met boeke en idees. Iemand wat weer vir ons almal wil vertel hoekom ons verkeerd doop. Ander wat weer vreemde name vir die Here uit die Ou Testament verkeerd aanhaal en wil hê ons moet Hom net so noem, nog ander wat wil hê ons moet terugkeer na die Sabbat toe. EN so kom die stemme- ek is reg, jy is verkeerd, glo net soos ek, anders is jy nie gered nie... So baie tradisies, so baie kerke, so baie opinies...  So baie baklei in die Naam van Jesus... Kyrie Eleison!!!

Uiteindelik hou ek maar net vas aan wat Jesus self gesê het in Joh 6:37- "Elkeen wat die Vader vir my gee, sal na My toe kom, en ek sal Hom wat na my toe kom, nooit verwerp nie... "

Ek weet nie of ek alles in die Bybel reg verstaan nie. Ek weet nie of ek dalk ietsie mis wat ek moes gedoen het nie. Maar ek weet dat Jesus gesterf het aan 'n kruis, as die Middelaar wat God en mens versoen het. EK weet Hy het dit ook vir my gedoen. Ek weet Hy het verhoudings kom herstel. Ek dink nie Hy is so omgekrap oor wanneer en hoe ek gedoop is, of ek in tale kan praat of nie, of ek hom as Jesus of Jahoeahh (die Hebreeuse uitspraak is eintlik Jahweh...) aanspreek nie, ek dink nie Hy is so tense oor Sabbatviering nie, en ek hoop regtig die besnydenis het verval!  Ek verstaan nie alles nie. Maar ek soek na sy genade... Kyrie Eleison. . 

Ek dink die Here se kindertjies maak geloof heeltemal te complicated. Ek is moeg vir boekies in die pos wat die eenheid tussen God se kinders net nog verder versteur deur mekaar verdag te maak. 

Ag so baie op die hart vandag hier agter die rekenaar...  Heaven knows how much it costs, to see my sin upon the cross... Eughan Heaslip... 

LAat ek nou maar verder werk aan Vrydag se boodskap- Jesus het alles kom nuut maak, deur ons uit die donkerte na die lig toe te kom lei! 

Kyrie Eleison! 

Ek weet nie by wie het ek hierdie skildery van Ruth Counsell van Darkness into Light gesien nie, dis die fondament van Vrydag se diens... 

"Worthy is the Lamb..." Angel Cruz... "Thank you for the Cross..."

Kyrie Eleison... 

  

Sondagmiddag- steeds die lekkerste ete as ons saam kan wees...

Vandag is een van daardie lekker dae in die lewe. Ek het vanoggend gepreek, en is nou klaar vir die dag. My ma en my dogter kuier by my, en al wat kort is my suster van Engeland. Om Annelie se familie bymekaar te kry is natuurlik baie moeiliker, maar ons was nou amper voltallig vanmiddag.

Ons het 'n wonderlike winskopie gekry- Lam uit Aberdeen (Suid Afrika) uit.
Die lam is met die nodige respek behandel:

Daarna was dit so lekker om die gesin om die tafel te hê. Saam met die lam was daar knoffelbrood, warm groente, en 'n slaai. Die slaai is heerlik saam met die Frogger balsamiese asyn wat ek daar by Oude Libertas vir my vrou se verjaardag gekoop het. En 'n bottel Rosé van Robertsons kelders.

Dis mos nou die lekker tye in die lewe so saam met jou eie mense. Al baklei die monstertjies maar nog steeds woes met mekaar, is daar darem hierdie enkele oomblik van vrede...

So pas gehoor een van my goeie vriende is ook op pad deur onse dorpie netnou, so nou kan ons nog 'n heerlike filterkoffietjie ook saam geniet! Die lewe is vandag mooi!

Saterdagmiddag in die Dominee se lewe

Hier sit ek nou in my studeerkamer op 'n Saterdag middag 15h30.  Ek het 'n heerlike oggend gehad, met van die mooiste skolerugby wat 'n mens kan verwag, sommer net hier by ons Hoërskool gespeel. Oor 'n uur draf my oudste seun weer op vir die 2e span.

Maar nou is dit eers studeerkamertyd.  Ek preek more oggend.

Dit bly een van die onbeskryflikste voorregte wat ons het, om op 'n Sondagmore voor amper 500 mense te kan staan, en vir hulle te kan sê: "So spreek die Here..."

Dit plaas 'n geweldige groot verantwoordelikheid op my skouers.  Ek kan nie net vir mense my eie storietjies vertel nie. Ek kan nie net 'n mooi sedelessie gaan uitpluk oor hoekom mense sekere sondes moet vermy nie. Uiteindelik moet ek iets regkry van om mense in God se teenwoordigheid in te lei. Om God se woorde te hoor. Om God se droom te hoor, van 'n ander wêreld as die een wat ons op die oomblik sien. 'n Wêreld vol liefde. Liefde wat hande en voete kry, liefde wat opoffer, liefde wat lewens positief kom verander.  Wanneer mense in die kerk 'n ontmoeting met God gehad het, moet hulle daar uitstap met nuwe hoop, dat die wêreld kan verander deur liefde. God se liefde. En ons liefde.

Dit is die Sondag voor Goeie Vrydag 2013. Ek wil dit waag om te preek oor die gebed van Jesus die aand voor sy kruisiging in Johannes 17.  Daarin het Hy gevra dat sy Vader verheerlik word, deur die oorwinning oor die stukkendheid van hierdie wêreld. Vir die mensdom is die kruis die grootste vernedering- om nakend voor die skare vasgespyker te wees, en wreed te sterf terwyl die inwoners van Jerusalem jou koggel en spot.   Maar wanneer Jesus daaroor praat, word dit "verheerliking"- die oorwinning oor self, die prysgee van self, die alles gee vir 'n baie groter saak.

Gaan die gemeente more dit hoor? Gaan hulle die prentjie sien wat in my kop is vanmiddag in my studeerkamer? Gaan Jesus se voorbeeld hulle inspireer om tot die uiterste toe te gaan liefhê?

'n Preek hou dalk so 20 minute aan. Maar mense onthou na die tyd omtrent net 2-3 beginsels.  Wat gaan mense oor more se preek onthou?  Gaan hulle lewens beter af wees na hulle daar was, of sou die Maleisiese Grand Prix meer beteken vir die ewigheid?

EK loop al die hele week en dink oor more se preek. Nou skryf ek enkele gedagtes neer op 'n stuk papier, wat more gebruik kan word, dalk ook nie...

Om te preek is 'n waagstuk, dit is moeilik, en dit vat lank om reg voor te berei.
En tog is dit ook lekker, as iemand se lewe vir 'n oomblik daardeur aangeraak is...

Picture from www.bible.ca

Die Stadigste Fietsryer in Nylstroom...

Ek het so pas my Argus resultate vir 2013 gaan soek, en toe op hierdie pragtige tabel afgekom by Racetec...
Dit bewys weer my stelling dat ek die stadigste fietsryer in Nylstroom is... Maar ek maak elke keer klaar...

Ek is bang om 'n foto hier by te sit, want ek is ook die lelikste fietsryer in Nylstroom... :-)

Verlede jaar die Vrydag voor die Argus, by Moyos by Eden on the Bay...

Pasop, die Ou Katte se naels is nog skerp...

More begin die Nylieweek in alle erns. Dit is die Hoërskool Nylstroom se sportweek in die Paasvakansie. Vanmiddag het die ander gasteskole in alle erns begin opdaag. Ons sien uit na baie lekker dae van sport, en ek hoop almal gaan dit baie geniet, en heel anderkant uitkom.

Maar die wedstryd wat ek die meeste na uitsien, is more middag 17h00.  Dan speel Hoërskool Nylstroom se Eerste Hokkiespan teen... drumroll... Hoërskool Nylstroom se eerste Hokkiespan... van so paar jaar gelede. Daar is 'n span saamgestel uit 'n paar oudskoliere, en ek het hulle netnou bietjie gaan dophou. Daar is 'n paar plaaslike legendes in daardie span!

Maar die een wat my oog natuurlik sal vang, is die Legendes se doelwagter- die Goallie met die rooi hare. Sy mag dalk vaagweg bekend lyk- 2 jaar gelede se 1e span Goallie:

Mag daar genade in oorvloed op die veld more middag wees!

Op Roete 62 by Ronnie se winkel...

Ek sien nou eers hoe lank het ek hierdie blog van my afgeskeep! Jammer julle!

Ek wil dit darem nog oop hou.
So hier is so 'n fototjie uit my lewe uit...  Eendag lank, lank gelede (verlede week...)

Ronnie se Sex Shop is 'n PUB langs Route 62, êrens tussen Ladismith en Bonnievale. Dit is 'n bekende toeriste aantreklikheid, die toerbusse stop in massas daar deesdae...  Nee, daar dans nie kaal meisies rond nie...

Die binnekant van die Pub is baie interessant, met die bra's van wittebroodpaartjies en ander verliefdes wat daar in die dak hang. Al die binnemure is vol graffiti van almal wat al daar was.  Daardie deel van die Klein Karoo is baie, baie warm, en die bier is lekker koud...