Scottburgh 2013 Gesinsvakansie

Ons lewe nog, dankie!

 Ons het die naweek weer ons jaarlikse karavaan kampeer gehad saam met ons gemeente. Ek begin regtig wens ek kon my karavaan nou meer as een keer per jaar gebruik!

Die naweek by Klein Paradys buite Nylstroom was baie lekker gewees. Maar dit was ook 'n tragiese naweek. Twee jong manne van ons gemeenskap is oorlede, een na 'n motorongeluk Vrydagaand, en die ander in 'n skietongeluk êrens in Amerika. Ons gemeenskap is stil geskok vanoggend. 

Ewald word 15 volgende week!

So herstel 'n man van Duitse Masels...

Die ander drie ook... My kinders is 'n kosbare geskenk van Bo!

Net sodat die ander drie nie afgeskeep voel nie... daar was mooi fotos van elkeen van julle op my twee ontdekte CD's...


Dis MY mense daardie... nie almal is mal oor kamp nie...

Ek is MAL oor my dogter die Avonturieër, al hou sy nie van kamp nie... niks kry haar onder nie...


#3- Ou Spaarks! Kyk na daardie oë, dan weet julle- maar net ek mag hom Spaarks noem!  Nog onseker van homself, maar dié ou gaan baie ver kom, hou hom dop!


En dan nommer 4- Piet... Nog ALTYD dinge op sy eie manier gedoen...

Julle is my lewe!

Dankie vir my gesin! Ek is baie lief vir elkeen van julle! 

Wou dit nou maar van my hart afkry so voor ons vanmiddag Louwrens se diens gaan bywoon... 

Die lewe stap sy paaie met ons almal...

Ek soek vanoggend iets in my studeerkamer, en kom af op twee CD's van Photolab, wat nog saam met 35 mm filmontwikkeling gescan is van 2002 en 2003...

Hierin kom ek weer af op Bernard se eerste dag in Graad 1:

.

Dit was nog so groot dag vir ons, veral vir sy ma...

En dan is dit so moeilik om te dink hoe vinnig die tyd met ons vlieg! 11 jaar later- die leiers van Hoërskool Nylstroom word aangewys... 

En van hierdie mannetjie

.
Het dit geword...

Ek skryf hierdie nie om te spog nie...

Saam met ons, verlede week, was die voorsitter van ons skool se Beheerliggaam, Louwrens van Aswegen, omdat sy dogter ook op die VLR gekies is. Die volgende dag is hy geopereer, want kanker is by hom gediagnoseer. Die vorige Woensdagaand het ons nog saam in 'n vergadering gesit, en niks geweet nie. Donderdag is die kanker gediagnoseer.  Dis more drie weke terug. Ons begrawe Louwrens vanmiddag...

'n Mens weet net nooit hoe lang tyd jy op aarde het nie. 'n Mens weet net nooit of jy ooit kans gaan kry om vir jou mense eendag tot siens te sê nie.

Hopelik oor baie jare, as my kinders dalk eendag hierna terugkyk, wil ek so graag hê hulle moet weet hoe trots ek op hulle elkeen is, en dat hulle my lewe elke dag baie, baie beter gemaak het. Al moan ek so oor die stukkende fietse en die weggeblxmde goeters...

Bernard, ek is trots op die man wat jy besig is om te word!

Word Riders 2013 Streekreunie

Die Word Riders van Nylstroom, Naboom en Potties het op Sondag 21  Julie 2013 by die Wimpy in Naboomspruit bymekaar gekom, en van daar af na die Dros in Potgietersrust toe gery vir 'n baie lekker middagete saam.  Danie Ueckermann kon nie daar wees nie.

Die groep van ons wat daar was:  Ek en my Geliefde!

Thomas en Ronel Freysen van Nylstroom

Philip en Marietjie van Niekerk van Naboomspruit

Hans en Theresa de Waal van Potties

Mense wat die Here, sy Woord en Motorfietse baie lief het. Ons het baie lekker gekuier (heel verantwoordelik ook!)

Anja se 20e Verjaardag- Deel 2

Woordeloos- die twee dames in my lewe...

Anja is vandag 20!

Ons het bietjie deurgekom Pretoria toe vir 'n fantastiese ontbyt saam met haar by Food Lovers Market. Almal van ons behalwe Stephan, wat nie van ry hou nie en die rekenaar die hele dag vir homself wil hê...

Drie geslagte dink saam tee...

Verlede week was die een ouma in ons dorp, nou die ander ene...

Al die dames in my lewe met dieselfde van as ekke...

Annelie en haar ma

Vanoggend het ek vir Vroulief en Skoonma vir ontbyt geneem by Koro Creek- die Gholflandgoed op Nylstroom.  Dit is so 'n mooi klubhuis, en ten spyte daarvan bly dit die goedkoopste restaurant in die dorp!
.

Vadersdag 2013 Soet en suur sover...

Die een ding wat ek in ons huishouding geniet, is die geleenthede wat ons soek om fees te vier. Ons vier verjaarsdae, heilige dae, onheilige dae soos Vaaltyn se verjaardag, en dan Moedersdag en Vadersdag...  Dit maak net seker dat ons die lewe in al sy fassette voluit geniet.

Maar hierdie Vadersdag het rof begin; een van ons gemeentedames is gisteraand in 'n motorongeluk oorlede.  Sy het twee klein dogtertjies, die jongste het my hart gesteel toe sy so mooi vir my glimlag toe ek haar doop...  Hulle almal het net hier skuins oorkant ons huis by hulle ouma gebly.  Dis 'n gesin waarvoor ek regtig baie lief is, en sulke nuus is baie traumaties.

Nadat ek daar gaan draai het, het ek op familieorders weer terug in die bed gaan klim. Die oudste twee kinders is nie hier nie, Anja werk deesdae by 'n restaurant in Pretoria, en Bernard is saam met Arno Botha se familie daar na Nelspruit toe om die toetsrugby op Mbombela Stadion  te gaan kyk. Daar kry Arno in die 3e minuut van sy 2e toets as Springbok seer...

Maar Annelie en die jongste het vir my 'n heerlike ontbyt in die bed bedien. Ek waardeer hulle omgee so baie!  Dis wat Gesin 'n lekker belewenis maak!  Sien met verwagting uit na middagete!

Go Ahead, make my day...

Reeds in 2006 was die jongste maar lief vir sy gevaarlike speelgoed...

Vanoggend se Philadelphia Preek

Ons geniet nou sulke lekker stormweer hier in die Kaap... Ons het die kaggel aangesteek, en sit nou met 'n glasie rooiwyn en geniet die vuur en mekaar se geselskap. Annelie sit en lees, ek sit en gesels met julle op my laptop...

Ag sommer net so bietjie meer oor vanoggend se preek:

Philadelphia is 'n klein gemeentetjie wat ek al 'n paar keer besoek het saam met my goeie vriend.
Op hulle uitnodiging het ek en Annelie vir die naweek afgevlieg, en vanoggend hulle erediens gelei.

Ek het gekies om oor Johannes 15:1-17 te preek, soos my Nylstroom-Oos vriende weet, een van my gunsteling teksgedeeltes. En reg oor die pad van die kerk in Philadelphia is die eerste wingerde...
God die Vader is die Boer. In liefde stuur Hy sy Seun na hierdie wêreld (Joh 3:16). Jesus bly in sy Vader se liefde. Hy is die Wingerdstok, en ons is die Lote.  Maar daar is twee soorte lote, vrugbare en onvrugbare lote.

Hierdie gemeente het die pragtige gebruik om die kinders aan die begin van die erediens na vore te laat kom, en dan word daar eers op hulle vlak met hulle gepraat. Ek het Anja gevra om my te help, om vir hulle prentjies te maak- die Hêppie Druif, en die Sêd Druif... (nou nie so genoem nie... :-) )

1. Sommige lote dra nie vrug nie...

" 'n Loot kan nie uit sy eie uit vrugte dra nie, so julle ook nie as julle nie in My bly nie...: Johannes 15:4

Dit gebeur mos nou so dat mense net vir hulleself wil lewe, sonder dat hulle lewens enige iets positiefs bydra tot hulle naaste. Dit is soos 'n loot wat al sy groei insit daarin om pragtige groot groen blare te hê- en dit lyk so weelderig en gesond! Maar dit waarvoor dit gemaak is, is nie daar nie- daar is nie druiwe nie...

Dit is hoekom die ou wêreld so stukkend is- so baie mense wat net vir hulle eie groei lewe...

Maar, daar is 'n baie beter alternatief!
En dis wat Jesus mos met ons kom deel het in Johannes 15
" Ek is die Wingerdstok, en julle is die Lote... wie in My bly, en Ek in Hom, dra baie vrug..."

Hoe lyk daardie vrug?  Jesus sê dit self- ons sal baie vrug dra as ons in Hom bly en sy opdragte gehoorsaam. En wat is daardie belangrike opdrag? "Julle moet mekaar LIEFHê"! So eenvoudig. Maar dit is wat die wêreld nodig het, dis in elke mens se lewe die vrug wat lewe bring: Liefde!  Dit maak van ons gelukkige druiwe:
Om lief te hê. Prakties. Nie net woorde nie!

Dit was vir my baie lekker om daar te preek so in die reën.  Dit was so kosbaar dat 'n hele klompie van my Kaapse vriende daar kon uitkom vandag, dankie julle! Ek is so geseënd met die kaliber vriende wat ek in Nylstroom en in die Kaap het!

En nou? Nou waai die wind. Dit reën. Dit sneeu in Adderley straat. Dit gaan rof in die weer. Dis nou die een aand wat ek nie graag op 'n motorfiets wil ry nie...

En tog... selfs in die storms is daar mooi oomblikke!
Kyk net hierdie foto wat ek enkele minute terug kon neem, ek kon dit nie waag om die venster te probeer oopskuif nie...

Ons was nou te lui/bang/moeg om ons goeie vriende van Bloubergstrand se aanddiens te gaan bywoon. Wat gebeur vanaand in ons lewe? Die kaggel brand, vroulief lees, ek speel op my laptop met julle, en ons drink saam rooiwyn-  Raka Pinotage...  'n 2011 Michelangelo bekroonde wyntjie...
Dis 'n absolute fantastiese aand, ten spyte van die weer...

Ek hoop jy het ook 'n fantastiese aand daar waar jy ook al mag wees...

Ek en Annelie ALWEER in die Kaap...

So gebeur dit toe mos dat die vriendelike gemeente in die Kaap vir my nooi om vanoggend by hulle te kom preek. Hulle sê Annelie moet saamkom. Hulle koop selfs vir ons vliegkaartjies... Hoe kan 'n mens dan nee sê vir sulke wonderlike geleenthede in die lewe. So ek en Annelie is in die Kaap op die oomblik. 

Ek het vanoggend my heel beste probeer met die preek. So ligte ou glipsie of twee gehad langs die pad, daar was so effense misverstandjie oor op wie die liedere op Powerpoint moes hê... maar niks ernstig nie. In die Kaapse stormweer was daar nou nie so baie mense in die kerk nie.  Maar ek het dit geniet om in die historiese ou geboutjie te mag preek... 

Onse kinders is veilig by ons huis, en ek en Annelie geniet 'n paar dae saam, soms met goeie vriende, soms lekker alleen. Ons het bv gisteroggend baie lekker ontbyt saam geëet by die ou Farmstall by die Total garage net buite Melkbosstrand, so skuins agter Atlantic Beach se Golflandgoed.  Dis koud en nat in die Kaap. Maar dit maak dit so lekker voor die kaggelvure... 

Hierdie reis doen ons sommer baie goed!  Ons eet baie interessante disse op baie interessante plekke, niks Wimpy of Spur nie, net lekker onafhanlike plekke wat hulle bes doen om goeie kwaliteit voor te berei.

Maar more is die pret alweer verby, dan moet ons alweer op die vliegtuig spring, en 'n verskil gaan maak waar ons geroep is om te wees...  Ek geniet net hierdie wegbreekkansie saam met my vrou geweldig baie!

Bernard 17 vandag!

Liewe Bernard,

Voor jou geboorte was ek bang om die pa van 'n seun te wees.  Ek het nie broers gehad nie. Ek het op skool nogal gesukkel met vriendskap.  Ek was nie baie goed in rugby nie, alhoewel ek my bes gegee het vir Newcastle Hoërskool se 3e span.   Ek was bang dat ek nie vir jou 'n goeie voorbeeld sou kon stel in die lewe nie.

Maar met jou vriendelike geaardheid het jy van die begin af diep in my hart gekruip. Ek het 'n belangrike ding van vaderskap geleer- dit gaan nie oor die abstrakte idee om 'n pa te wees nie, maar die verhouding met 'n spesifieke seun, wat die verskil maak.

Ek is baie trots op jou.  Ek bewonder die man wat jy besig is om te word. EK bewonder jou sagte hart, en die mooi manier waarop jy met mense werk. Ek bewonder jou talent op 'n rugbyveld, en waar jy hard maar eerlik speel, jou beste gee sonder om ander doelbewus te beseer.

Ja, nou kan jy 'n leerlinglisensie vir 'n kar kry. En ek hoop en bid dat jy in hierdie opsig ook meer verantwoordelik as ek gaan wees.  Ek dink jy gaan...

Mag jy ook eendag die regte meisie ontmoet, wat die mooi in jou gaan raaksien, en mag jy haar soos 'n prinses behandel, maar dis hoe ek jou ken- jy sal...

Geniet jou verjaardag. Dis baie lekker om jou pa te wees, ek is baie trots op jou!

Jou Pa...

Eerste Twitterdiens oor Kolossense 1- Wie is Jesus?

Hierdie is 'n preek vir NG Gemeente Nylstroom-Oos op 5 Mei 2013. 

Inleiding

In die ou dae het 'n plattelandse dominee eendag rondgestap, en toe op 'n baie vreemde toneel afgekom. Daar was 'n jong seun, wat by 'n wa gestaan het. Die wa se vrag hooibale het afgeval en op 'n hoop gelê.  Dit was baie warm, maar die jong man het verwoed geprobeer om die hooibale weer terug op die wa te kry. Hy was papnat gesweet, en het na sy asem gehyg.

Die dominee het hom gestop en gesê hy lyk darem baie warm, wil hy nie net 'n oomblik stop en water drink dat hy kan beter voel nie? "Nee dankie", sê die jong man- "my pa gaan nie daarvan hou nie!"  Die dominee sê vir hom:  "Maar alle mense mag mos soms darem 'n breuk ook vat! Kom, rus so bietjie dat jy kan beter voel!"

" Nee", sê die jongman, "my pa gaan nie daarvan hou nie. "

Die dominee het sommer omgekrap geraak. Hy sê toe: "Klink my jou pa is 'n regte slawedrywer! Waar kan ek hom in die hande kry, ek gaan verseker vir hom iets te sê hê oor hoe hy jou behandel! " "Wel", sê die jongman- "hy lê daar onder die hooibale... "

Wat op aarde leer ons uit hierdie verhaal? Die jong man het geweet wat hy moes doen. Daar was 'n sin vir dringendheid by hom,  hy was doelgerig en niemand, nie eers die dominee, kon hom van sy koers afhaal nie.  Maar dit het nie gekeer dat iemand hom probeer stop het nie!

Die dominee het die situasie heeltemal verkeerd verstaan. Hy was oortuig dat hy reg was, en hy het alles in sy vermoë probeer om die jong man te laat ophou met wat hy besig is. Wat het dit met vanoggend se teks te doen? 

Die kerk in Kolosse het ook so 'n probleem gehad. Hulle was 'n doelgerigte kerk gewees. Hulle het baie hard probeer om hulle Hemelse Vader te verheerlik.  Paulus het selfs vir hulle 'n brief geskryf waarin hy hulle aanprys vir hulle geloof, en hulle liefde.

Maar daar was iemand wat hulle probeer stop het met wat hulle besig was.  Paulus het in Kol 2:8 vir hulle gewaarsku: 

Daar was godsdienstige mense in Kolosse wat die kerk probeer stop het in waarmee hulle besig was.  Hierdie mense het allerhande vroom praatjies gehad, maar die mense weggelei van die basis van hulle geloof af. Ander dinge as Jesus het skielik belangrik geword. 

Dit is vandag tyd om weer oor hierdie dinge te praat. Want daar is vandag weer sulke stemme soos destyds in Kolosse. Daar is mense wat allerhande interessante teorië oor die geestelike lewe het. Party wil weer heeltemal die Joodse name vir God as die enigste Name gebruik. Party wil weer die Sabbatdag soos in die Ou Testament hou. Party wil hê jy moet in tale kan praat om gelowig te wees.  Jy moet kan profeteer.  Ek is verbaas dat iemand nog nie weer die besnydenis ook wil hê nie!  Baie teorieë word voorgehou as Die Waarheid- en word gesê die Kerk  mislei jou.  So word die kerk al meer opgebreek deur 'n klomp teorieë wat as Die Waarheid verkondig word.

Dis waarteen Paulus dit in Kolosse gehad het. Dis waaroor ek so lekker omgekrap raak deesdae.

Daar is net een Waarheid in die kerk- en dit is die Persoon van Jesus Christus. Jesus het gesê: Ek is die Weg, en die Waarheid, en die Lewe...

Alles anders is bysake!  Die Waarheid is Jesus!

As jy vergeet wie Jesus is, en as jy vergeet wat Hy vir jou gedoen het,  dan sal jy altyd 'n teiken vir dwaalleer wees.  As jy nie op die fondament van Jesus jou geloof bou nie, gaan jou geloofshuisie êrens inmekaar tuimel.

Daarom begin Paulus sy brief aan die Kolossense om weer te herinner wie Jesus is, en wat Hy alles vir ons gedoen het.

1.    A. Jesus is ‘n ewigheid al ons Middelaar.

Wanneer ‘n mens Kol 1:15-20 in Grieks lees, is dit pragtige poësie, met ‘n baie duidelike ritme. Dit word algemeen aanvaar dat dit ‘n gesang uit die Vroë Kerk was, wat Paulus hier aanhaal. Dit is ‘n gesang wat die eerste Christene herinner het wie Jesus is. 

1. Jesus is die Seun van God.

Jesus was nie maar net nog ‘n goeie mens êrens in die antieke geskiedenis nie. Hy is nie net ‘n profeet soos ‘n Elia of ‘n Jesaja van ouds nie. Hy was nie ‘n aardse Koning met baie mag, soos Dawid nie. Jesus staan in ‘n heel unieke verhouding met God. Hy is self ook ewige God, deel van die Drie-Eenheid wat aan ons geopenbaar word in die Bybel.  Daarom is sy lewe op aarde ook die grootste gebeurtenis ooit in die geskiedenis, toe God self in die volheid van die tyd sy Seun gestuur het om sy liefde aan die wêreld bekend te maak. 

2. Jesus is die Beeld van God.  

Van die mense in Kolosse het geglo dat God nie die aarde geskep het nie, aangesien Hy niks sou maak wat boos en sleg is nie. Alle stoflike dinge, insluitend ons menslike liggaam, was volgens hierdie tipies Griekse denkwyse sleg, en kon daarom nie van God af kom nie.

Maar Paulus stel Jesus weer aan hulle voor. Deur sy wese, ook sy Liggaam, vertoon Hy die beeld van God. God het die mens, vir Adam en Eva, geskape as sy beeld. Maar met die sondeval het die beeld van God in die mens gebreek. Vir baie jare het hierdie wêreld nie meer die beeld van God gesien nie. Totdat Jesus as mens gebore is. En Jesus was ook mens, waarlik mens, maar sonder sonde. En daarom kon Hy weer die beeld van God vertoon. Die apostel Johannes het gevra- wil jy sien hoe lyk die Vader? Kyk dan na die Seun. (Joh 14:9).

‘n Volgende dwaalleer in Kolosse was dat Jesus nie die Seun van God was nie, maar net nog een van die talle tussengangers tussen God en mens. Dit is ‘n dwaalleer wat vandag nog steeds voorkom in die wêreld. Baie mense glo vandag dat Jesus net nog ‘n goeie mens was, soos ‘n Mandela, of ‘n Gandhi. Selfs Mohammed, die vader van Islam, het in die Koran Jesus ingeskryf as net nog ‘n profeet.  Was Jesus net ‘n goeie mens? 

3. Jesus is die Eersgeborene (Eerste) van die Skepping.

Paulus doen groot moeite om Jesus aan ons voor te stel as Ewige God, van die begin af saam met die Vader. Hy was daar voor die Skepping. Dit is mos wat Johannes ook vir ons in hoofstuk 1 van sy evangelie sê: In die begin was die Woord daar... en die Woord was by God, en die Woord was self God. Hierdie Woord is Jesus.

 4. Jesus is Skeppingsmiddelaar.

Middelaar- dit is ‘n tussenganger, iemand wat dinge laat gebeur.

Paulus sê as ons die Skepping wil verstaan, kan ons nie dit indink sonder die Seun van God nie.  Vers 16- “God het deur Hom alles geskep wat in die hemel en op die aarde is, alles wat gesien kan word, en alles wat nie gesien kan word nie.”

Die skepping staan nie los van Jesus nie. Johannes 13 stem saam en sê ook dat alle dinge deur Hom tot stand gekom het. Paulus sê Hy is aangestel bo alle konings, heersers, maghebbers, gesagvoerders. Paulus wil Jesus voorstel as die Verlosser wat van die begin af in ons wêreld betrokke is. Hierdie is sy wêreld, want alles is vir Hom geskep. En omdat hierdie sy wêreld is, kan ‘n mens net waarlik gelukkig wees as jy in ‘n verhouding met die Koning van die wêreld lewe. Dit is hoekom hierdie wêreld so deurmekaar is- die Koning word nie erken en geëer nie.

5. Jesus hou alles in stand. 

Vers 17 sê: “Voor alles was Hy al daar, en deur Hom bly alles in stand.”

Een van die vroegste dwaalleer was dié van Arius. Hy het gesê dat daar ‘n tyd was wat Jesus nie was nie. Of anders gestel, daar was ‘n tyd wat Jesus nie bestaan het nie. En baie mense vandag dink ook so. Hulle dink dat Jesus eers met sy geboorte op daardie eerste Kersdag op die wêreld se verhoog verskyn het.  En tog leer ken ons Hom in die Woord as Ewige Here, wat alles onderhou. Wat beteken dit vir ons vandag? Jesus is my Ewige Here, wat altyd vir my sorg. 

6. Jesus is die Hoof van die kerk.

In Romeine 12, en 1 Kor 12, gebruik Paulus die beeld dat die Kerk die liggaam van Christus is. Elke gelowige is deel van hierdie liggaam, en het sy eie unieke funksie binne die kerk. Maar wie is die Hoof van die kerk. Gelukkig nie die dominee of die kerkraad nie! Vers 18 gee die antwoord.

“Hy is die Hoof van die liggaam, van die kerk. Hy is die oorsprong daarvan. Hy is die Eerste, die Een wat uit die dood opgestaan het, sodat Hy die eerste plek in die heelal inneem.”

Die Opgestane Here, die Lewende Here, is die Hoof van die kerk. Deur Jesus se opstanding uit die dood het Hy die nuwe lewe vir gelowiges gewaarborg. Die opstanding van die Here Jesus uit die dood was die oorwinning oor alle magte wat die mensdom gevange gehou het. Met daardie eerste Paassondag het Jesus nuwe hoop en nuwe lewe vir die mensdom gebring.  En dit is dan ook hoekom die kerk bestaan- ons moet die boodskap van hoop en nuwe lewe aan alle mense verkondig, en dit met ons lewens vir hulle wys. Kan die wêreld regtig in ons lewens sien dat ons anders is, dat daar ‘n nuwe lewe in ons te sien is? Ons moet elkeen bekend wees as mense wat hoop bring. Kry ons dit reg? Of kla ons ook maar net soveel soos die mense sonder enige hoop?

7. Jesus is waarlik God en Verlosser.

Vers 19 sê dat God met sy volle wese in Jesus woon. Alle mag wat God as Skepper en Onderhouer van die heelal het, het Hy ook aan Jesus gegee. God het Homself ten volle aan die wêreld in Jesus geopenbaar. Daar is geen ander tussenganger of middelaar tussen God en mens as Jesus nie. Deur Jesus is daar nou vrede met God. v 20 “ God het deur Hom alles met Homself versoen. Deur die Bloed van sy Seun aan die kruis het Hy die vrede herstel, deur Hom het Hy alles op die aarde en in die hemel met Homself versoen.”

Wie het Jesus se versoening nodig?

2. Elke mens het Jesus as Verlosser nodig.

Die Bybel sê dat elke mens gebore word as vyand van God. vers 21- “Ook julle was voorheen ver van God af en vyandig gesind teenoor Hom, soos blyk uit julle sondige lewenswyse.”

Van nature is ons in opstand teenoor God. Ons leef nie in ‘n verhouding met Jesus as Koning van die wêreld nie. Mense steur hulle nie meer aan God nie. Die wêreld se mense word al hoe meer ateïsties.

Maar op ‘n dag begin die Heilige Gees ‘n mens oortuig dat daar ‘n God is, en dat jy nie meer langer sonder God kan bestaan nie. ‘n Oorweldigende sondebewustheid pak ‘n mens beet. Jy kom skielik agter hoe die sonde ‘n skeidsmuur tussen jou en God geword het, wat jy nie self kan wegneem nie.

Ons kom agter dat die sonde ‘n geweldige kloof tussen ons en God veroorsaak het. Kan ons self oor hierdie kloof van sonde spring?  Ons kan dan nie eens oor die Grand Canyon spring met ons eie krag nie. Nie eers die Olimpiese gouemedaljewenner in verspring kan dit begin oorweeg nie. Hoeveel groter is die kloof tussen God en mens nie as die Grand Canyon nie!  En geen mens kan eers begin dink dat hy self dié kloof kan oorsteek en vrede met God verdien nie. Die kloof tussen God en mens, wat sonde veroorsaak het, is daarvoor veels te wyd.

Hoe kan ons dan weer met God versoen word? Hoe kom ons in die regte verhouding met God? Daarvoor kan net God sorg. “Maar nou het Hy ook julle met Homself versoen deurdat sy Seun as mens gesterf het om julle te heilig, sonder smet en onberispelik voor hom te stel.” 

God het Jesus laat gebore word aan ons kant van die kloof. En omdat Jesus sonder sonde is, kon Hy die brug word wat die kloof na God oorbrug. Ons kan nie met sonde voor God verskyn nie. Maar Jesus het al ons sonde op Hom geneem en daarvoor betaal. Ons sonde het geen skuld meer nie, en ons is welkom by God.  Dit is net moontlik deur Jesus wat ons sonde wegneem.

Wat is ons verantwoordelikheid in ons verlossing? Ons moet in geloof aan Jesus vashou.

Vers 23- “Maar dan moet julle vas en sterk bly staan in die geloof en julle nie laat losruk van die hoop wat in julle gewek is deur die evangelie wat julle gehoor het nie.”

Jesus het vir ons alles gedoen wat nodig is om met God versoen te word. Hy het saam met die Vader gewerk om vir ons ‘n leefwêreld te skape. Hy werk saam met die Vader om elke dag vir ons te sorg. Hy het mens geword, en al ons sonde op Hom geneem. Hy het onskuldig aan die kruis gesterf sodat ons sonde vergewe kan word. Hy het uit die dood opgestaan, om die ewige lewe vir ons te waarborg. Hy is die Hoof van die kerk, dié kerk wat die evangelie aan die wêreld verkondig, wat hoop aan die wêreld bring.

Om waarlik te lewe, moet ons die Koning van die wêreld ken. Om waarlik gelukkig te wees, moet ons waarlik vir Hom lewe. Ons het Hom nodig..

Mag ons elkeen daarom aan Hom alleen bly vashou, en ons nooit laat losruk van die lewende hoop wat Hy vir ons is nie. Mag ons lewenswa nie omval met allerhande onnodige bakleiery oor klein dogmatiese verskilletjies nie. Kom ons fokus daarop om Jesus lief te hê as ons Redder en ons Hoof. En omdat dit Sy opdrag is- kom ons hê mekaar lief! 

Amen.